Jy kyk daarna en sien dit nie: dit heet onsigbaar.
Jy luister daarna en hoor dit nie: dit heet onhoorbaar.
Jy gryp daarna en kry dit nie beet nie: dit heet ontasbaar.
Hierdie drie kan jy nie verder uitpluis nie;
hulle smelt saam tot een.

Bo is dit nie helder nie,
onder is dit nie donker nie.
Eindeloos loop dit voort, en jy kan dit geen naam gee nie;
dit keer terug na niks.
Dit is die vorm sonder vorm,
die beeld sonder ding.
Dit is vaag en ontwykend.

Gaan dit tegemoet, en jy sien nie sy voorkant nie.
Volg dit, en jy sien nie sy agterkant nie.

Hou vas aan die Weg van ouds
om die dinge van vandag te hanteer.
Wie die oeroue begin ken,
ken die draad van die Weg.