Wanneer almal weet wat mooi is,
ontstaan lelikheid.
Wanneer almal weet wat goed is,
ontstaan die slegte.

So bring wees en nie-wees mekaar voort,
moeilik en maklik voltooi mekaar,
lank en kort meet mekaar,
hoog en laag leun teen mekaar,
klank en stem pas by mekaar,
voor en agter volg mekaar.

Daarom doen die wyse sonder om in te gryp
en leer hy sonder woorde.
Die tienduisend dinge kom op, en hy keer hulle nie;
hy laat hulle groei, maar besit hulle nie;
hy werk, maar steun nie daarop nie;
die werk word voltooi, maar hy eis dit nie op nie.

En juis omdat hy dit nie opeis nie,
gaan dit nooit verlore nie.